दोहे दुमदार

दुमदार दोहे 

1
देवी के दरबार मे,भीड़ हवय भरमार। 
रखहू बने सम्हाल के, बटुवा झन हो पार।  
अबड़ हे चोर उचक्का। 
पार कर देही पक्का।  

2
घर के बाई छोड़ के, बाहिर ला झन झाँक। 
सपड़ाबे जब तँय कका, कटा जही जी नाक। 
मारही डंडा भारी। 
बगरही जगभर चारी। 

3
कुकरा बासत उठ जथे, हो जाथे तइयार। 
बइला ला भूँसा खवा, जाय किसनहा खार। 
धरे नाँगर वो जाथे। 
खेत मा जाय कमाथे। 

4 
बखरी मा फइले रहय, आनी बानी नार। 
परिया कर दिस बेंदरा, बारी बखरी खार। 
बेंदरा रार मचावय। 
साग तरकारी खावय। 

5 
पिंजरा के मैना असन, तड़फत हँव दिन रात। 
कब आबे जोही बता, ले के तँय बारात। 
ददा रिस्ता खोजत हे। 
कहाँ जाने बोजत हे।

रचनाकार-दिलीप कुमार वर्मा 
बलौदाबाजार छत्तीसगढ़