गजल

गजल
221 2122 221 2122

राजा बने भिखारी,जे मन नशा करत हे।
रहिथे जवान तब ले, कमजोर हो मरत हे।

बाढ़े जे भाव भारी,देखव पताल के जी।
आये समे ग अइसे, रसता म ओ सरत हे।

भगवान के कभू जी,दीखय नही ग लाठी।
करनी करे ग जइसे, तइसे इहाँ भरत हे।

भारत बढ़ाय ताकत,जे चन्द्रयान भेजे।
दुनिया करे बड़ाई,कतको मगर डरत हे।

ये मानसून देखव,धोखा करे हे भारी।
बरसात में न आये, सब धान हा जरत हे।

बारी उजाड़ देथे,आ बेंदरा ह भाई।
हे खेत मा उन्हारी,गरुवा सबो चरत हे।

रुकजा दिलीप थोरिक, छइहाँ हवय थिराले।
झन भाग पाय पइसा,तन तोर बड़ छरत हे।

दिलीप कुमार वर्मा
बलौदाबाजार
23-7-2019