गजल

गजल
221 2122 221 2122

सुख्खा परे किसानी,देखव किसान रोवय।
बाती असन बरागे,कइसे ग धान होवय।

वादा करे हकन के,अब दाँत ला निपोरे।
पइसा तको सिरागे, अब मान तक ल खोवय।

रसता परे हे पथरा, सब रोज के हपटथे।
सरकार हर हटाही, सन्देश ला पठोवय

बरसात के महीना, मच्छर अबड़ पनपथे।
कूलर भराय पानी, कइसे मजा म सोवय।

लइका चलाय गाड़ी,अब्बड़ भगाय देखव।
सम्हले न जे अचानक,जिनगी ले हाथ धोवय।

मझधार मा फँसे हे, ये नाव जिंदगी के।
अब कोन हा बचाही, पीरा दिलीप ढोवय।

दिलीप कुमार वर्मा 
23-7-2019